Alex Eala, panalo sa unang laban niya sa Hong Kong Open kontra kay Emerson Jones

Hindi nakaapekto sa laro ni Alex Eala ang biglaang pagbabago sa kaniyang kalaban matapos niyang talunin ang Australian na si Emerson Jones, 6-4, 6-3, sa unang round ng Hong Kong Open nitong Martes.

Si Alycia Parks ang orihinal na makakaharap sana ni Eala ngunit pinalitan ito ni Jones matapos umatras si Parks ilang oras bago ang laban dahil sa injury sa balikat.

Dahil sa panalo, pasok na ngayon ang Filipina tennis star sa Round of 1, sa harap ng kaniyang hangarin na tapusin nang maganda ang kaniyang season ngayong taon.

Sa unang set, kaagad na ipinakita ni Eala ang kaniyang dominasyon laban kay Jones, na nasa ika-132 puwesto sa world rankings, matapos makalamang nang 4-0 sa unang set. Gayunman, naisalba ng 18-anyos na Australian ang kaniyang sarili na ma-zero nang masungkit ang sumunod na tatlong games upang makadikit sa Pinay tennis star.

Matapos maitala ni Eala ang 5-3 na kalamangan, bumawi si Jones at nakuha ang sumunod na game upang maibaba niya sa 5-4 ang iskor.

Muntik pang maitabla ni Jones ang laban matapos magkaroon ng 40-15 kalamangan sa Game 10. Gayunman, nakapagtala si Eala ng apat na sunod na puntos, kabilang ang tatlong errors mula kay Jones, upang maselyuhan ang panalo sa unang set.

Lalo pang pinatindi ng 21-anyos na si Eala ang kaniyang laro sa ikalawang set matapos makalamang nang 4-1 sa Game 5.

Sinamantala rin ni Eala ang sunod-sunod na pagkakamali ni Jones upang tuluyang tapusin ang laban sa loob ng isang oras at 23 minuto.

Sunod na makakaharap ni Eala si Tereza Valentova, na nagwagi naman sa dalawang sets laban sa Japanese player na si Himeno Sakatsume.