Immigration officer na nagpapalusot umano ng illegal recruits, arestado

Isang immigration officer ang inaresto dahil sa pagpapalusot umano ng mga illegal recruit sa halagang P40,000 kada isa para pagtrabahuhin sa mga scam hub sa Cambodia.

Sa ulat ni John Consulta sa Unang Balita nitong Huwebes, mapanonood sa CCTV footage sa NAIA Terminal 1 ang isang babaeng pasahero na kaharap ang isang immigration officer na naka-duty sa counter.

Tila ordinaryo mang immigration check ang nagaganap sa departure area, pero isa na pala itong planadong pag-alis upang mapalusot ang isang human trafficking recruit.

Gayunman, nakipag-ugnayan na ang recruit sa National Bureau of Investigation o NBI matapos ang ilang pagdududa.

Pagka-recruit sa kaniya, binilinan umano siya ng sindikato kung ano ang dapat gawin para makadaan, partikular ang immigration officer na kasabwat ng sindikato.

“May binigay na mapa na pupunta ako sa counter 5 and then ‘pag nakita ko raw po 'yung immigration officer is makipagtitigan ako. Para po malaman ng immigration officer na ako 'yung palalampasin niya na applicant,” sabi ni “Aileen,” ni-recruit ng sindikato.

“Tinanong niya ako kailan ang balik ko. So wala po akong nasagot kasi hindi ko po alam. And then siya na rin po sumagot sabi niya September 15. After po noon kinindatan niya ako. Pagka kindat niya po sa akin, tinatakan niya 'yung passport ko,” dagdag niya.

Pagkadaan ng recruit, agad dinakip ng NBI Dangerous Drugs Division at NBI Human Trafficking Division ang nagpalampas na immigration officer.

Maliban sa sketch na ibinibigay sa mga recruit, na-recover ang mga text na may direksyon ng lahat ng dapat nilang gawin para makaalis ng bansa.

Isinalaysay ng recruit sa NBI na inalok silang maging call center agent sa Thailand na may sweldong P50,000 kada buwan. Ngunit nagduda umano siya nang may biglang ipinadalang bag sa kaniyang paglipad.

“She was trying to back out from the employment. But later, nu’ng tinakot siya na pagbabayarin siya ng P20,000 yata or if hindi siya tutuloy and tinakot siya na may paglalagyan nga siya, she found the courage to report that to us,” sabi ni Atty. Ross Jonathan Galicia, Chief of Dangerous Drugs Division, NBI.

Sinabi ng NBI na palulusutin ng immigration officer ang limang pasahero sa kaniyang counter noong araw na iyon. Halagang P40,000 kada palulusutin ang bayad ng sindikato sa immigration officer.

Pagdating sa Thailand, Malaysia at Hong Kong, may mag-a-arrange ng lipad nila papuntang Cambodia para magtrabaho sa mga scam hub.

“They have developed an ecosystem to do human trafficking. Wala nang usap. Pagdating sa counter, hindi na magsasalita 'yung victim. Tititigan lang. Ang instruction, titigan mo lang 'yung immigration officer. Tapos magkikindatan, tapos na. Yun na 'yung transaksiyon,” sabi ni NBI Director Atty. Melvin Matibag.

Dalawa pang Pilipino ang nailigtas na pinalusot ng inarestong immigration officer. Nakabalik na ng Malaysia ang isa habang patuloy na pinaghahanap ang dalawa.

Samantala, anim na iba pa ang kinasuhan ng qualified human trafficking, kabilang ang ilang empleyado ng Bureau of Immigration (BI).—Jamil Santos/AOL GMA News