NBI, sinubpoena ang mga miyembro ng 'Machong Chismisan' podcast

Naglabas ang National Bureau of Investigation (NBI) ng mga subpoena sa mga miyembro ng podcast na "Machong Chismisan" matapos ang kanilang mga pahayag tungkol kay Joshua "Josh" Aquino, anak ni Kris Aquino.

Inimbitahan ang mga miyembro ng podcast na humarap sa NBI sa iba't ibang oras sa Oktubre 20, Martes, para magbigay-linaw sa imbestigasyon tungkol sa mga paglabag umano sa Magna Carta for Disabled Persons, kaugnay ng Cybercrime Prevention Act of 2012.

Umani ng batikos ang podcast dahil sa burado nang episode na pinamagatang "Ang Pagbabalik Ni Kris Aquino," kung saan nagbigay ng mga mapangutyang pahayag ang mga host kay Josh sa pamamagitan ng pagkukumpara sa kaniya sa kaniyang nakababatang kapatid na si Bimby, pati na rin ang panlalait tungkol sa kaniyang kapansanan.

Kasunod ng mga negatibong reaksiyon, tinanggal na ng "Machong Chismisan" ang episode at humingi ng tawad sa buong pamilya Aquino.

Tinuldukan din ng Pod Network ang kontrata nito sa podcast.

Ayon sa ulat ni Sam Nielsen sa Super Radyo dzBB, dalawang miyembro na ang nakatanggap ng kanilang mga subpoena.

Sinabi rin umano ni NBI Director Melvin Matibag na hindi sapat ang paghingi ng tawad ng mga miyembro ng podcast para mabura ang pananagutang kriminal.

Nauna nang sinabi ng TV host na si Boy Abunda na kung tatanungin siya ni Kris, papayuhan niya itong magsampa ng mga kaso laban sa mga nagkasala umano.

Sa isang post sa Instagram, sinabi ni Kris na pinili niyang huwag maglabas ng pahayag bilang tugon sa "irresponsible and uninformed opinions" dahil ayaw niyang bigyan sila ng "word war" na inaasahan nila. —Jamil Santos/AOL GMA News