Ambulansyang rumesponde sa aksidente, sinalpok ng TNVS

Wasak ang harapang bahagi ng isang kotse matapos ito sumalpok sa ambulansya sa northbound lane ng EDSA-Balintawak sa Quezon City kaninang 3:40 a.m.

Sa lakas ng pagkakabangga, natanggal ang pintuan ng ambulansya ng Barangay Unang Sigaw na may nirespondehang aksidente sa lugar.

May sakay itong 53-anyos na taxi driver na nasugatan matapos mabangga ng motorsiklo.

“Basta’t nakahiga lang ako eh tapos sumalpok na kaya napatayo ako. Masakit yung dibdib ko tapos yung kamay ko tapos yung kanang tuhod,” kuwento ng sugatang taxi driver.

Ayon sa driver ng ambulansya, paalis na sila para dalhin sa ospital ang taxi driver nang mangyari ang aksidente.

“Mabilis po siguro sir kasi yung impact po sa amin talagang ano kaya pumutok yung airbag niya kasi nagulat din kami ang lakas ng pagkakabangga. Talagang yung ulo ko napaganon sa manibela kasi paandar pa lang ako biglang may sumalpok na sa likod ko,” ani Dennis Delos Reyes, ang driver ng ambulansya ng Barangay Unang Sigaw.

Bahagya ring nasugatan sa kamay ang 32-anyos na driver ng kotse na isang TNVS.

Ihahatid niya sa Valenzuela ang sakay na pasahero na galing sa Pasay.

Posible raw nakaidlip siya.

“Doon pa ako nakita ko na ambulansya ewan ko bakit yan. Baka oo ganyan nakaidlip,” sabi ng TNVS driver.

Inilipat ng ambulansya ang sugatang taxi driver para madala sa ospital.

Iniimbestigahan pa ng QCPD Traffic Sector 1 ang aksidente. — BAP GMA News