Babaeng 'di umano nagpautang ng P1,000, pinatay at ginahasa ng 2 katrabaho sa Talisay City

Nakasilid sa sako nang matagpuan ang bangkay ng isang 33-anyos na babae na malapit sa pinagtatrabahuhan niyang manukan sa Talisay City, Negros Occidental. Ang suspek sa krimen, ang dalawa niyang katrabaho na nagturo pa sa kinaroroonan ng biktima.

Sa ulat ni Eileen Pedreso sa GMA Regional TV Ratsada Balita nitong Miyerkoles, sinabing limang araw nang nawawala ang biktima na nagtatrabaho bilang labandera sa manukan.

Ayon sa pulisya, dalawang lalaki na edad 34 at 44, na mga empleyado rin sa manukan ang nagbigay ng impormasyon sa pagkakatuklas sa bangkay ng biktima.

Ngunit nagduda ang awtoridad sa dalawa at itinuring na persons of interest sa kaso dahil sa kaduda-duda nilang mga pahayag.

Nang isalang na sa imbestigasyon, doon na umano umamin ang dalawang lalaki na pinatay at pinagsamantalahan nila ang biktima.

Ang hindi umano pagpapautang sa kanila ng biktima ng P1,000 ang dahilan kaya nila ito pinatay noong Oktubre 8, ayon pa sa pulisya.

Inamin din umano ng mga suspek na gumagamit sila ng ilegal na droga.

Inihahanda na ang kasong murder na isasampa laban sa mga suspek, na hindi na nagpaunlak ng panayam.—FRJ GMA News