Binatilyong dumalaw sa kaniyang gf, ginulpi ng 'di bababa sa 10 kabataan sa Cebu City

Selos ang hinihinalang dahilan sa ginawang pagkuyog ng nasa 12 kabataang lalaki sa isang 17-anyos na binatilyong dumalaw lang sa kaniyang nobya sa Cebu City.

Sa ulat ni Alan Domingo sa GMA Regional TV Balitang Bisdak nitong Biyernes, sinabing nangyari ang insidente noong hatinggabi ng Linggo sa Barangay Cogon Pardo.

Sa kuha ng CCTV camera, makikita ang biktima na nakaupo sa gilid ng daanan nang dumating ang grupo ng mga kabataang lalaki at tila pinaligiran siya.

Kinausap muna ng grupo ang biktima pero hindi nagtagal ay pinagsusuntok na ang binatilyo at may sumipa pa.

Natigil lang sa pag-atake ang grupo nang may residenteng lumabas para sitahin sila sa ginagawang pananakit sa biktima.

Nai-report na sa barangay ang insidente at pinatatawag ang mga kabataang nanakit sa biktima.

Napag-alaman na residente sa ibang kugar ang binatilyo at dumayo lang sa barangay kung saan nangyari ang insidente para bisitahin ang kaniyang nobya. – FRJ GMA News