4 na lalaking sakay sa kotse na patay sa pamamaril sa Maguindanao del Sur, magkakamag-anak

Nakilala na ang apat na lalaking sakay sa kotse na nasawi matapos silang pagbabarilin sa Maguindanao del Sur. Aalamin ngayon ng mga awtoridad kung katransaksyon ng mga biktima ang mga salarin.

Sa ulat ni Efren Mamac sa GMA Regional TV One Mindanao nitong Martes, tinadtad ng bala ang sasakyan ng mga biktima sa Barangay Tulunan nitong Lunes ng hapon.

Ayon sa pulisya, magkakamag-anak ang mga biktima na pawang residente ng President Quirino sa Sultan Kudarat.

Lumalabas sa imbestigason ng pulisya na mablis na tumakas ang mga salarin matapos nilang ratratin ng bala ang mga biktima.

Pinaniniwalaan na mga nakatransakasyon ng mga biktima sa bentahan ng lupa ang nasa likod ng krimen.

“Sa ngayon, isa sa tinitingnan is may transaction sila doon sa area about sa pagbili ng lupa. Pero isa lang ‘yon sa tinitingnan natin,” ayon kay Police Captain Steffi Salanguit, Spokesperson, PNP-PRO-BAR

“And ‘yung mga bangkay naman ng mga victim ay nakuha na ng kanilang pamilya kasi ito sila coming from one family lang,”dagdag niya.

Nagsasagawa umano ng hot pursuit operation ang kapulisan laban sa mga suspek.

Sinusubukan pang makuhanan ng pahayag ang mga kaanak ng biktima, ayon sa ulat.– FRJ GMA News