Magkapatid na batang lalaki na nangunguha ng kangkong na kanilang iuulam, nalunod

Nauwi sa trahedya ang pagkuha ng magkapatid na batang lalaki ng kangkong na kanilang uulamin mula sa isang palaisdaan nang malunod silang pareho sa Bayambang, Pangasinan.

Sa ulat ni CJ Torida sa GMA Regional TV One North Central Luzon nitong Miyerkoles, sinabing dakong 10:30 am nitong Martes nang nagtungo ang magkapatid na lalaki na edad 9 at 10 sa palaisdaan na hindi kalayuan sa kanilang bahay.

Kasama rin nila noon ang isa nilang pinsan na menor de edad din.

Pero habang nangunguha ng kangkong, napunta ang nakakabatang kapatid sa malalim na bahagi ng tubig ng palaisdaan.

Kaagad naman siyang sinaklolohan ng nakatatanda niyang kapatid pero maging ito man ay napunta na rin sa malalim na bahagi ng palaisdaan.

Dito na humingi ng tulong sa ibang tao ang kanilang pinsan pero hindi na nailigtas ang buhay ng magkapatid.

Sinabi ng ama ng magkapatid na si Joenil Vigo, na doble ang sakit na kaniyang nararamdaman sa sinapit ng mga anak.

Nagtatrabaho si Vigo bilang helper sa isang junk shop sa Bulacan upang maitaguyod ang kaniyang pamilya.

Noong nakaraang Sabado nang huli niyang makausap sa telepono ang mga anak at hindi niya inakala na iyon na ang huling pagkakataon na makakausap niya ang dalawa.

Samantala, kaarawan pa man din ngayon ng ina ng mga bata na si Mary Joy.

Ngunit ang dapat sanang masayang selebrasyon, napalitan ng pagdadalamhati dahil sa sinapit ng mga bata.

Aalamin naman ng pulisya kung may pananagutan ang may-ari ng palaisdaan sa nangyari sa magkapatid.

Sinusubukan pang makuhanan ng pahayag ang may-ari ng palaisdaan, ayon sa ulat.—FRJ GMA News