Alex Eala, pinataob si Talia Gibson kahit nagpakaba muna nang matalo sa unang set ng laban nila sa Pan Pacific Open

Nakabawi si Alexandra “Alex” Eala mula sa pagkatalo sa unang set upang pataubin ang Australian na si Talia Gibson, 4-6, 6-2, 6-0 sa kanilang sagupaan sa Round of 16 sa Pan Pacific Open nitong Miyerkules sa Tokyo, Japan.

Muntik nang maagang magpahinga sa torneo ang 21-anyos na Pinay tennis star, ngunit nanatili siyang palaban sa huling dalawang set upang talunin world No. 38 na si Gibson, at makapasok sa quarterfinals sa unang pagkakataon ng Asian Swing.

Dahil sa panalo kay Gibson, makakaharap muli ni Eala sa quarterfinals ang third seed na si Diana Shnaider, na tumalo sa kaniya sa Round of 16 ng Ningbo Open nitong nakaraang Huwebes sa China.

Sa laban niya kay Gibson, sinikap ni Eala na makabawi sa unang set nang mapanalunan niya ang Game 9. Gayunman, sinamantala ng 22-anyos na si Gibson ang pagkakamali ni Eala sa backhand upang masungkit ang unang set.

Hindi basta sumuko ang Filipina ace laban kay Gibson, na dalawang beses na niyang tinalo sa kanilang nakaraang dalawang paghaharap.

Mabilis na nakalamang si Eala sa 5-2 sa ikalawang set bago tuluyang iselyo ang panalo sa pamamagitan ng isang backhand winner.

Napahaba pa ni Gibson ang Game 8 at sinubukang pigilan si Eala, ngunit nagawang manaig ng Pinay para maitulak ng ikatlo at deciding set.

Sa huling set, ipinakita ng world No. 19 na si Eala ang kaniyang determinasyon nang limitahan sa limang puntos lamang si Gibson sa unang apat na laro. Winalis pa niya ang Game 4 upang makalamang nang 4-0.

Muntik na ring hindi makapuntos si Gibson sa Game 5, kung saan nakalapit na si Eala sa pagkuha ng match point. Gayunman, lumaban si Gibson sa Game 6 at nakakuha ng dalawang pagkakataon para maagaw ang serve ni Eala.

Sa kabila nito, nanatiling matatag ang Filipina tennis star at tuluyang tinapos ang laban upang makapasok sa quarterfinals ng torneo.—FRJ GMA News